عزيزتي الهيئة القومية للتأمين الاجتماعي
نحسبها بالعقل، يلا نعمل دراسة تقديرية سريعة لإيراداتك من الاشتراكات بس، ونشوف الدنيا واقفة فين.
أولاً: موظفو الدولة
الجهاز الإداري للدولة فيه حوالي 3.9 مليون موظف، ومرتباتهم السنوية كلها بتساوي 823 مليار جنيه.
بافتراض إن نسبة الإعفاءات 30%، يبقى أجر الاشتراك الفعلي الخاضع للتأمينات هو 70% من المرتبات.
يعني وعاء الاشتراك = 823 مليار × 70% = 576 مليار جنيه.
ونسبة التأمينات القانونية 28.25%، يبقى المورد السنوي من موظفين الدولة = 576 مليار × 28.25% = 163 مليار جنيه تقريبًا.
خليك فاكر الرقم ده كويس، اوعى تنساه.
ثانيًا: موظفو القطاع الخاص
العاملون في القطاع الخاص المسجلين رسميًا عددهم حوالي 24.2 مليون عامل، والحد الأدنى للأجور 7000 جنيه في الشهر.
إجمالي أجورهم السنوية التقديرية = 24.2 مليون × 7000 × 12 = 2033 مليار جنيه.
ونفس الكلام، نسبة الإعفاءات 30%، يبقى الصافي الخاضع = 2033 مليار × 70% = 1423 مليار جنيه.
ونسبة اشتراكات القطاع الخاص 29.75%، يبقى المحصل من القطاع الخاص = 1423 مليار × 29.75% = 423 مليار جنيه تقريبًا.
ثالثًا: قسط الحكومة السنوي
الحكومة ملتزمة بقسط سنوي للهيئة قيمته 238 مليار جنيه.
يلا نجمع بقى الأرقام كلها
المتحصل من موظفين الدولة 163 مليار، زائد المتحصل من القطاع الخاص 423 مليار، زائد قسط سداد الحكومة 238 مليار.
الإجمالي = 824 مليار جنيه سنويًا.
اشتراكات فقط.
تمام؟ … تمام.
طيب، نيجي بقى للمصروفات، هنصرف كام معاشات؟
عدد المستحقين للمعاشات حوالي 11.5 مليون مستحق، ومتوسط المعاش الشهري 5000 جنيه.
إجمالي المعاشات السنوية = 11.5 مليون × 5000 × 12 = 690 مليار جنيه.
الفرق بين الإيرادات والمدفوعات
الإيرادات 824 مليار، والمعاشات 690 مليار.
الفرق = 134 مليار جنيه سنويًا فائض.
دا من غير عوائد الاستثمار الرصيد المرحل من سنوات سابقة وغير الإيرادات من مصادر أخرى مثل تأمين السيارات وشركات المقاولات وغيرها.
عارفين ياهيئة إنك تمويل ذاتي بالكامل، وإن كل مصروفاتك حتى المرتبات والحوافز والمكافأت والبدلات والسهر وغيرها بتقبضوها من اشتراكاتنا السنوية إللي بتتخصم من المنبع، الكارثة إنك تكوني بتحصلي عمولة تحصيل وتوزيعيها مكافآت.
ويرجع حد من قياداتك يقول لك إنت دفعت كام عشان تطلب معاش 8000 جنيه إللي هو الحد الأدنى للدخل إللي قررته الدولة، طيب ما هو في فائض أهو!.
طيب نعرف بقي مصاريفك كام والباقي بيروح فين ودا حق أصيل لأرباب المعاشات.
استقيموا يرحمكم الله
