مقالات

أنا والكلبة عسلية.. أشهر ضيوف مهرجان القاهرة السينمائي

على طرف السجادة الحمراء بدار الأوبرا المصرية، تقف «عسلية» — صاحبة الرقم الكودي 4233 — وهي تنظر بنصف عين للكاميرات والمصورين الذين يطاردونها في كل خطوة، بينما تحاول أخذ قيلولة قصيرة بعد يوم طويل من الفلاشات.

في البداية أزيك يا عسلية برحب بيكي، مبروك تصدرك التريند، إنت بقيتي أشهر من نجوم الصف الأول في الدورة دي، إيه سر السعادة دي؟، عسلية (بضيق وتهز ذيلها بعصبية): سعادة إيه يا أستاذ؟ الله يرضى عنك سيبني في حالي!، أنا أصلاً صاحبة مكان هنا، دار الأوبرا دي بيتي طول السنة وعايشة فيها في هدوء وسلام، فجأة ألاقيكم فارشين سجاد أحمر في الصالة بتاعتي، ومسلطين كشافات تعمي العين، وكل شوية حد بيجي يطبطب عليا عشان ياخد لقطة للسوشيال ميديا!.

قاطعتها قائلًا: بس الناس كلها بتحبك، حتى الفنان الكبير حسين فهمي، رئيس المهرجان بنفسه جه يطمن عليكي ويداعبك،عسلية: الأستاذ حسين نفسه أول واحد حابب ياخد اللقطة، ما أنا موجود طول السنة في الأوبرا، ليه مجاش يطبطب عليا غير لما بدأ المهرجان، و شاف الكاميرا، و كمان يا أخويا كان بييجي قبل بداية المهرجان، وكان موجود في المركز، وكان بيشوفني ولا عمره سلم عليا، غير لما بدأ يشوف فلاشات وكاميرات الموبايل مرفوعة في وشنا، هو راجل ذوق ومحترم وبيقدر أصحاب المكان.

وفي الحقيقة ، أنا لا بعرف أعمل «بوز» للكاميرا، ولا جاية أستعرض فستان، أنا كل إللي كنت عايزاه شوية هدوء أنام فيهم على السجادة الدافية دي، لقيت نفسي تريند وبيقولوا عليا «خطفت الأضواء»!، يا جماعة أنا كلبة بلدي في حالي، ومطعمة ومعقمة ومعايا بطاقتي (رقم 4233)، مش ناقصة دوشة الفلاشات.

بالراحة كده.. طب إيه أكتر حاجة مضايقاكي في حضور المهرجان السنة دي؟، عسلية: حاجتين بصراحة؛ أولاً: إنكم بتسموني «ضيفة غير متوقعة»!، ضيفة إيه يا جماعة ده بيتي، أنتم إللي ضيوف عندي مدة المهرجان وهتمشوا، وثانيًا: إن أصحابي لما شافوني اتشهرت جم يزوروني على الريد كاربت، فطلعتوا علينا إشاعة إننا عاملين «مهرجان الكلاب الدولي»، إحنا بنحضر العروض من زمان في صمت، لا بننتقد أفلام ولا بنعمل لقاءات تليفزيونية، بس إنتم إللي بتحبوا اللمة والتريند.

الصحفي: كلمة أخيرة لجمهورك وللمصورين إللي مستنيينك تتحركي؟، عسلية: (وهي تتثاءب وتضع رأسها على السجادة الحمراء): إرحموني من الفلاشات، وهاتولي وجبة حلوة بدل الميكروفونات دي، وإللي عايز يتصور معايا ييجي في هدوء من غير دوشة، عشان ورايا قيلولة مهمة قبل عرض بالليل، وشكرا يا أخويا وأبقي زورني كل سنة مرة، زي ما غنى سيد درويش، ما أنا عارفة هيخلص المهرجان من هنا لا هشوفكم ولا تشوفوني، و السلام عليكم.

زر الذهاب إلى الأعلى